Preto de 250 inscritos na XV Carreira Popular e IV Andaina Concello de Guitiriz Termal que se celebrará este sábado

03/04/2025

Preto de 250 persoas participarán este sábado, 5 de abril, na XV Carreira Popular e IV Andaina Concello de Guitiriz Termal, organizada polo Concello en colaboración coa Asociación Capaces. A proba forma parte do I Circuíto de Carreiras Populares da Terra Chá.

Hoxe, xoves 3 de abril, tivo lugar a presentación do evento na Escola Habanera, na que participaron a alcaldesa de Guitiriz, Marisol Morandeira; o concelleiro de Deportes, Iván Morado, e o atleta local e presidente do Club Atletismo Guitiriz, Toño Teijido.

Marisol Morandeira agradeceu a todos os colaboradores, así como ao Club Atletismo Guitiriz, “pola organización do evento, que ademais este ano ten como principal novidade a Carreira adaptada, que será accesible para todas as persoas que se animen a participar”.

A rexedora tamén quixo destacar que “este ano o recadado a través das inscricións e da Fila 0 irá para a Asociación Capaces”, apuntando que “aínda que as inscricións xa están pechadas, a Fila 0 seguirá aberta ata o propio sábado”.

Morandeira explicou que “todos os anos tratamos de contribuír con algunha asociación que teña membros no noso municipio, e este ano optamos pola Asociación Capaces”.

Pola sua parte, Toño Teijido explicou que “a andaina comezará ás 16:00 horas, mentres que as carreiras empezarán a partir das 17:30 horas. Terá un percorrido similar ao de outros anos, con dúas voltas con saída desde o Campo da Feira ata os Sete Muíños”. Tejido tamén apuntou que “os premios non serán acumulativos, se gañas a carreira non serás o gañador da categoría, o obxectivo é repartir os trofeos xa que esta é unha proba solidaria”.

Dúas categorías de andaina e sete para a Carreira

O concelleiro de Deportes, Iván Morado, explicou que “en total haberá 242 participantes, que se dividirán entre nove categorías diferentes, dúas para a andaina e sete para a carreira”.

En función  dos grupos de idade, a carreira desenvolverase en diferentes modalidades e distancias. As categorías son: Andaina adultos (2009 e anteriores) e Andaina menores (2010 e posteriores) un percorrido de 9.000 metros, Biberóns (2018 e posteriores) e Carreira Adaptada 200 metros, Sub10 (2016-2017) e Sub12 (2014-2015) 800 metros, Sub14 (2012-2013) e Sub16 (2010-2011) 1.560 metros  e Absoluta (2009 e anteriores) 5.000 metros.

Os dorsais poderanse recoller a partir das 15:30 horas e ata media hora antes do inicio no Campo da Feira e habilitaranse duchas no Pavillón Municipal Jonathan Carro Paz.

Dispositivo de tráfico

Estará prohibido estacionar o sábado 5 de abril de 14:00 a 20:00 horas na marxe esquerda (sentido baixada) da Rúa Río Forxa e no entorno da Praza do Campo da Feira. Ademais, cortarse o tráfico na Praza do Campo da Feira, na Rúa do Mercado e na Avenida Poeta Díaz Castro (desde a Praza do Campo da Feira ata a intersección co Paseo dos Sete Muíños) de 15:00 a 19:30 horas. Tamén haberá cortes de tráfico temporais no Paseo dos Sete Muíños e na Rúa As Costaneiras entre as 15:00 a as 19:30 horas.

Nas rúas afectadas polos cortes de tráfico estará permitido o estacionamento de vehículos (a excepción dos lugares indicados), se ben durante o tempo en que o tráfico estea cortado non se permitira a súa posta en marcha e circulación. Ademais, quedarán inhabilitados os puntos de recargar eléctricos.

O artigo Preto de 250 inscritos na XV Carreira Popular e IV Andaina Concello de Guitiriz Termal que se celebrará este sábado publicouse primeiro en Concello de Guitiriz.